‘‘ภิกฺขุนีนํ ธมฺมกถํ, ปฏิปุจฺฉากริํ อหํ;
สาสิตา ตา มยา สพฺพา, อภวิํสุ อนาสวาฯ
[160]
‘‘สตานิ ปญฺจนูนานิ, ตทา ตุฏฺโฐ มหาหิโต;
ภิกฺขุนีนํ โอวทตํ, อคฺคฏฺฐาเน ฐเปสิ มํฯ
[161]
‘‘สตสหสฺเส กตํ กมฺมํ, ผลํ ทสฺเสสิ เม อิธ;
สุมุตฺโต สรเวโคว, กิเลเส ฌาปยิํ มมฯ
[162]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[163]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[164]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นนฺทโก เถโร อิมา คาถาโย
อภาสิตฺถาติฯ
นนฺทกตฺเถรสฺสาปทานํ ปญฺจมํฯ
6. กาฬุทายิตฺเถรอปทานํ
[165]
‘‘ปทุมุตฺตโร นาม ชิโน, สพฺพธมฺเมสุ จกฺขุมา;
อิโต สตสหสฺสมฺหิ, กปฺเป อุปฺปชฺชิ นายโกฯ
[166]
‘‘นายกานํ วโร สตฺถา, คุณาคุณวิทู ชิโน;
กตญฺญู กตเวที จ, ติตฺเถ โยเชติ ปาณิเน [ปาณิโน (สี. สฺยา ปี.)]ฯ
[167]
‘‘สพฺพญฺญุเตน ญาเณน, ตุลยิตฺวา ทยาสโย;
เทเสติ ปวรํ ธมฺมํ, อนนฺตคุณสญฺจโยฯ
[168]
‘‘ส กทาจิ มหาวีโร, อนนฺตชินสํสริ [อนนฺตชนสํสทิ (สี.), อนนฺตชนสํสุธิ (สฺยา.), อนนฺตชนสํสรี (ปี.)];
เทเสติ มธุรํ ธมฺมํ, จตุสจฺจูปสญฺหิตํฯ
[169]
‘‘สุตฺวาน ตํ ธมฺมวรํ, อาทิมชฺฌนฺตโสภณํ;
ปาณสตสหสฺสานํ, ธมฺมาภิสมโย อหุฯ
[170]
‘‘นินฺนาทิตา ตทา ภูมิ, คชฺชิํสุ จ ปโยธรา;
สาธุการํ ปวตฺติํสุ, เทวพฺรหฺมนราสุราฯ
[171]
‘‘‘อโห การุณิโก สตฺถา, อโห สทฺธมฺมเทสนา;
อโห ภวสมุทฺทมฺหิ, นิมุคฺเค อุทฺธรี ชิโน’ฯ
[172]
‘‘เอวํ ปเวทชาเตสุ, สนรามรพฺรหฺมสุ;
กุลปฺปสาทกานคฺคํ, สาวกํ วณฺณยี ชิโนฯ
[173]
‘‘ตทาหํ หํสวติยํ, ชาโตมจฺจกุเล อหุํ;
ปาสาทิโก ทสฺสนิโย, ปหูตธนธญฺญวาฯ
[174]
‘‘หํสารามมุเปจฺจาหํ , วนฺทิตฺวา ตํ ตถาคตํ;
สุณิตฺวา มธุรํ ธมฺมํ, การํ กตฺวา จ ตาทิโนฯ
[175]
‘‘นิปจฺจ ปาทมูเลหํ, อิมํ วจนมพฺรวิํ;
‘กุลปฺปสาทกานคฺโค, โย ตยา สนฺถุโต [โย ตว สาสเน (สฺยา.)] มุเนฯ
[176]
‘‘‘ตาทิโส โหมหํ วีร [ตาทิโสหํ มหาวีร (สฺยา. ก.)], พุทฺธเสฏฺฐสฺส สาสเน’;
ตทา มหาการุณิโก, สิญฺจนฺโต วา มเตน มํฯ
[177]
‘‘อาห มํ ‘ปุตฺต อุตฺติฏฺฐ, ลจฺฉเส ตํ มโนรถํ;
กถํ นาม ชิเน การํ, กตฺวาน วิผโล สิยาฯ
[178]
‘‘‘สตสหสฺสิโต กปฺเป, โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[179]
‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;
อุทายิ นาม นาเมน, เหสฺสติ สตฺถุ สาวโก’ฯ
[180]
‘‘ตํ สุตฺวา มุทิโต หุตฺวา, ยาวชีวํ ตทา ชินํ;
เมตฺตจิตฺโต ปริจริํ, ปจฺจเยหิ วินายกํฯ
[181]
‘‘เตน กมฺมวิปาเกน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[182]
‘‘ปจฺฉิเม จ ภเว ทานิ, รมฺเม กปิลวตฺถเว;
ชาโต มหามจฺจกุเล, สุทฺโธทนมหีปเต [สุทฺโธทโน มหีปติ (สฺยา.)]ฯ
[183]
‘‘ตทา อชายิ สิทฺธตฺโถ, รมฺเม ลุมฺพินิกานเน;
หิตาย สพฺพโลกสฺส, สุขาย จ นราสโภฯ
[184]
‘‘ตทเหว อหํ ชาโต, สห เตเนว วฑฺฒิโต;
ปิโย สหาโย ทยิโต, วิยตฺโต นีติโกวิโทฯ
[185]
‘‘เอกูนติํโส วยสา, นิกฺขมิตฺวา อคารโต [นิกฺขนฺโต ปพฺพชิตฺถโส (สี. สฺยา.)];
ฉพฺพสฺสํ วีตินาเมตฺวา, อาสิ พุทฺโธ วินายโกฯ
[186]
‘‘เชตฺวา สเสนกํ มารํ, เขปยิตฺวาน อาสเว;
ภวณฺณวํ ตริตฺวาน, พุทฺโธ อาสิ สเทวเกฯ
[187]
‘‘อิสิวฺหยํ คมิตฺวาน [อิสิวฺหยํ ปตนํ คนฺตฺวา (สฺยา.)], วิเนตฺวา ปญฺจวคฺคิเย;
ตโต วิเนสิ ภควา, คนฺตฺวา คนฺตฺวา ตหิํ ตหิํฯ
[188]
‘‘เวเนยฺเย วินยนฺโต โส, สงฺคณฺหนฺโต สเทวกํ;
อุเปจฺจ มคเธ คิริํ [มาคทคิริํ (สี.), มงฺคลาคิริํ (ปี.)], วิหริตฺถ ตทา ชิโนฯ
[189]
‘‘ตทา สุทฺโธทเนนาหํ, ภูมิปาเลน เปสิโต;
คนฺตฺวา ทิสฺวา ทสพลํ, ปพฺพชิตฺวารหา อหุํฯ
[190]
‘‘ตทา มเหสิํ ยาจิตฺวา, ปาปยิํ กปิลวฺหยํ;
ตโต ปุราหํ คนฺตฺวาน, ปสาเทสิํ มหากุลํฯ
[191]
‘‘ชิโน ตสฺมิํ คุเณ ตุฏฺโฐ, มํ มหาปริสาย โส [มมาห ปุริสาสโภ (สฺยา. ปี.)];
กุลปฺปสาทกานคฺคํ, ปญฺญาเปสิ วินายโกฯ
[192]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[193]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[194]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กาฬุทายิเถโร อิมา คาถาโย
อภาสิตฺถาติฯ
กาฬุทายิตฺเถรสฺสาปทานํ ฉฏฺฐํฯ
7. อภยตฺเถรอปทานํ
[195]
‘‘ปทุมุตฺตโร นาม ชิโน, สพฺพธมฺเมสุ จกฺขุมา;
อิโต สตสหสฺสมฺหิ, กปฺเป อุปฺปชฺชิ นายโกฯ
[196]